كتير مننا بيمر بلحظات بيكون قلبه محطم لمواقف مختلفه سواء زميل عمل غدر بيك علشان يتقرب للمدير، أو حبيب خانك ووجع قلبك قبل النهاية بلحظات، أو صديق العمر شاف مصلحته في ضرر ممكن يحصلك وكمل للآخر، أو حد إنت مؤتمنه على أسرارك وراح قال للناس عليها.
بعدها بتحس بظلام شديد وكإن روح بتنسحب منك بتحاول تخرج منه، ولكن .....
العلاج هو الإيمان
الإيمان بإن الظلام اللى ملى روحك مجرد بداية لحياة جديدة، خبره جديده، ويتولد من رحم الظلام إنسان جديد، إنسان أكثر حكمه،أكثر عقلانيه.
خلي بالك الانكسار اللى حصلك وأنت ملحقتش تعالجه وانفجر في وشك وعمل ندوب شوهتك من جوه، الانكسار ده ممكن تجمع القطع جنب بعضها وتعمل أجمل لوحه فنيه تعجب كل الناس لدرجة إن في ناس تتمنى إنها تتحطم زيك ويمكن أسوأ منك لو كانت دي النتيجة الإلاهيه الحتميه القدرية.
اصنع عالمك الجديد من قطعك المحطمه، لا تلتفت، مارس رياضه أنت بتحبها ويا سلام لو كانت من الرياضات العنيفة أو رياضات المقاومة، اخرج، اقرأ ويمكن بداية القراءة تكشفلك إن جواك شخصية جميلة أنت ما تعرفهاش.
عزيزي (عزيزتي) محطمي القلوب .. لولى حب الله لكم مكنتوش اتحطمتوا علشان تشوفوا أجمل وأفضل وأقوى نسخه منكم.
وفي النهاية ثق في نفسك أنك الأفضل بالتأكيد
